السيارات المستعملة

• لم نعد نسمع عن حملة خليها تصدى التى انطلقت لفترة ليست قليلة على مواقع التواصل الاجتماعى وذلك بهدف الحد من الارتفاع الجنونى لأسعار السيارات الجديدة اوالزيرو كما يطلق عليها رغم نزول الرسوم الجمركية من قبل الدولة

وهذه الحملة لم تؤثر على بيع السيارات الجديدة فحسب بل امتدت ايضا إلى السيارات المستعملة وأصبح سوق السيارات المستعملةفى ركود تام واصبح بيع سيارة يمثل ضربا من الخيال بالنسبة لاصحاب لاصحاب السيارات المستعملة ويقول أحد الشباب الذين دشنوا هذه الحملة:-
السلام عليكم
قد يكون هذا هو البيان الاخير لحمله خليها تصدي والذى ترددت فى كتابته على مدار ثلاث سنوات كنت بحاول اني ارد فيه على الكثير من الرسايل والتعليقات
وطلبات الاستضافه فى القنوات والحوارات فى الصحف والاذاعات
احنا لما عملنا الحمله دى كنا مجموعه شباب محدش فينا عارف التانى وعلى مدار 4 سنوات لحد اللحظه دى
محدش فينا شاف ولا قابل التانى نهائى .. فينا اللى مهندس واللى محامى واللى ديزاينر واللى شغال فى شركه بترول فى اللى عايش فى مصر وفى اللى كان بره مصر فى ذلك التوقيت
يعنى ناس متعلمه ووظايفها مرموقه رفضت فى وقت من الاوقات الزياده المجحفه اللى حصلت فى ارتفاع اسعار السيارات بدون مبرر
وقتها بفكره بسيطه اتجمعنا عليها لرفض الزياده غير المبرره والحقيقه مكنش فينا حد بيبخل بمجهوده فى اى حاجه
حتى الاعلانات المموله اللى كنا بنعملها على بوستات الصفحه كانت من نفقتنا الخاصه

عملنا الحمله دى فى اكتوبر 2015 وقتها كان الدولار بحوالى 7.60 قرش . ووقتها كان اقصى زياده رسميه للدولار حوالى 40 قرش او 50 قرش
وكان قصاد ال 50 قرش تجار السيارات بيزودوا الاسعار بال 40 و 50 و 100 الف ده غير طبعا بدايه فكره الاوفر برايس
وده كان اساس الحمله اللى انتم وقفتوا معانا ودعمتونا فيه لان هدفنا واحد
ثبات الاسعار وعدم الاستغلال

احنا فضلنا مستمرين معاكم نمدكم بكل جديد وكل اخبار والحقيقه كان عندنا مجهود وباور لا تتخيلوه
مع العلم فى نقطتين مهمين وحطوا تحتهم 100 خط
احنا تعرضنا لكل انواع السباب وكل انواع التهديدات سواء من اصحاب معارض كبرى وتجار او من شغالين عندهم
او حتى قله من الصحفيين المحسوبين عليهم فى نشر اخبارهم

وفى نفس الوقت احقاقا للحق .. محدش فينا اتعرض عليه رشوه من الاساس سواء بشكل مباشر او غير مباشر وبرضه وقف معانا ناس كتير جدا من الصحفيين والاعلاميين المحترمين جدا لتوصيل رسالتنا
ناس كتير قالوا قبضوا وهيقبضوا ووووو
احنا عربياتنا زى ماهى من قبل الحمله وحتى الان محدش فينا زاد عليه كاوتش عربيه
وللامانه سهل اقولكم اتعرض علينا رشاوى وفلوس وووو الخ ورفضنا ونعمل ابطال
بس الحقيقه ان ده محصلش ابدا

طب ايه اللى وقفنا وليه سكتنا رغم كل اللى اتقال هل خوفنا هل يئسنا هل وهل اسئله كتير فتحت اجتهاد لكل واحد عايز يقول حاجه يقولها ؟؟!!

نقطه الفصل بالنسبالنا كانت تعويم الجنيه
وبدل ماكنا بنحارب عشان زياده سعر الدولار 50 قرش
وقتها حصل التعويم والدولار مكنش موجود اصلا وسعره فى السوق السودا وصل ل 20 جنيه
ده غير طبعا ان البنك المركزى عمل ليمت للتحويلات والاعتمادات البنكيه والقرارات اللى كلكم عاصرتوها

هنا الموضوع وصل لسياسه دوله اكبر مننا كلنا وبالتالى كنا كلنا فى مرحله محدش فاهم حاجه ولا عارفين رايحين فين واللى يقولك فى البلد كلها فى التوقيت ده انه فاهم حاجه من اللى بتحصل يبقى كداب
ووقتها كان اى بوست هاينزل هيبقى فى اتجاه مضاد تماما لسياسه الدوله وكان اى حد ممكن يستغله فى الاتجاه اللى يعوزه

وطبعا سهل اوى اقولكم اتعرضنا لضغوطات وافلام ونعمل مره تانيه ابطال
بس برضه ده محصلش طبعا فى ناس مش هتصدق بس انا كنت بطلع بنفسى ف كل القنوات وكان سهل اوى اى حد يحب يوصلى مش صعبه يعنى
ومع ذلك عمرى ما جالى تليفون واحد او اى تهديد ليه علاقه بالدوله نهائى

احنا اللى قررنا من نفسنا نوقف كل شئ عشان محدش ياخد اى تصريح او اى كلمه تطلع فى اتجاه يضر بمصلحه البلد
وكان محدش فينا عارف الدولار رايح على فين وهيوصل لحد كام ويقف ومحدش كان هيقدر يوجه اى كلمه لاى تاجر انه يوقف ارتفاع اسعار
حتى لو بتشترى لبان ولا لحمه ولا فاكهه الكلمه اللى بتسمعها من اى بايع .. الدولار والاسعار

بس وقتها وقبلها كنا بنقول على اتفاقيه الجمارك الاوربيه ان سنه 2019 هينزل الجمارك لصفر دى اتفاقيات من زمان معروف تواريخها مش مفاجأه

هل الحمله اثرت على التجار ؟؟
نعم اثرت عليهم جدا جدا وكانوا بيترعبوا منها وده انا لمسته بنفسى مع كل حوت من حيتان سوق السيارات

الحمله بعد كده تم نسخها بقوه للجزائر وراحت اكتر من بلد وكل الميديا اتكلمت عنها

طب وبعدين .....
دلوقتى الجمارك وصلت صفر بالنسبالنا مش مفاجأه احنا قلنا الكلام ده من سنين وتقدروا ترجعوا لاى حديث واى تصريح

دلوقتى فى ثبات نسبى فى الاسعار والارض خصبه جدا ان الحمله تقوم تانى وبالفعل فى جروبات كتير بدأت تظهر تحاول تستغل اسم الحمله السابق لنفس الهدف

الهدف هايفضل واحد وهيفضل دايم لكل الازمنه والعصور لكل شخص مالوش اى اغراض اخرى
منع الجشع ومنع الاستغلال والرقابه على زياده الاسعار

لكن محدش يطلع يتكلم بأسمنا نهائيا احنا عندنا متحدثنا الرسمي وقت مانحب نتطلع او نتكلم لكن احنا حاليا فى وضع الفريز
***********
طبعا احنا خدنا شتايم ملهاش حصر لكل الناس اللى كانت عايزه تشترى عربيات قبل التعويم ولما حصل التعويم للجنيه والاسعار زادت ال 3 اضعاف
الكل قال احنا السبب .. احنا عمرنا ماكنا السبب ولا حد فينا كان يعرف ان سياسه البلد رايحه للتعويم احنا كنا بنحارب نصف جنيه زياده اسعار
مش 3 اضعاف سعر الدولار وقتها
مش هقولكم متحملوناش حاجه وقرار مكنش فى ايدينا احنا كان هدفنا نبيل وخير
طب هو احنا اللى زودنا اسعار العربيات واللحمه والخضار والاكل والشرب والكهربا والعقارات كل ده عملته حمله خليها تصدي ؟!!!!
فكر قبل ماتتسرع
لو انت لسه مقتنع ان احنا السبب فى غلاء كل ده وكل حاجه فى حياتك وحواليك يبقى احنا اللى كلنا الجبنه
**********
طب والبوست ده ليه يعنى عايز مننا ايه ؟؟
البوست ده كان ممكن يتكتب فى اى يوم فى ال 3 سنين اللى فاتوا وكنت كل مره ارجع وامسح الكلام
بس انا عايز اقول احنا مرجعناش الحمله ولا اعرف ان ممكن ترجع ولالا بس لو رجعت هتبقى من خلال الصفحه دى
وده ميمنعش اننا بنقدم كل الدعم لكل شخص عنده نفس الاهداف السابقه
اما بالنسبه للشتايم والاتهامات اللى بناخدها فاعتقد ان 3 سنين كانت كفيله ان يصيبنا حاله من التبلد والتعود على حاجه احنا معملناهاش
وفى الاول والاخر ربنا شايف وعالم

نبارك لكم انتهاء الجمارك على السيارات الاوربيه
اسف للاطاله ولنا لقاء قريب
محمد راضي
مؤسس حمله #خليها_تصدي
وانا مؤيد تماما لكل كلمة قالها المحترم محمد راضى وكمت مؤيد جدا للحملة واتمنى حملات مماثلة لمحاربة الجشع ليس فى السيارات فقط بل فى كل المنتجات

x

الوسوم: سيارات